به‌ريا 12 سالا د رۆژا 17. 10. 1998ێ‌ چه‌ند كه‌سه‌كێن كورد ل ده‌رڤه‌يي وه‌لاتي ب رێيا هێلا ئينتێرنێتێ‌ ل سه‌ر تورا پالتالكێ‌ كۆچكه‌كا كوردي ڤه‌كرن.

<>

12 سال ژ ماندينه‌بوونێ‌ د راگه‌هاندنا پالتالكێ‌ دا! ئارمانج عه‌گيد نێروه‌يي*

به‌ريا 12 سالا د رۆژا 17. 10. 1998ێ‌ چه‌ند كه‌سه‌كێن كورد ل ده‌رڤه‌يي وه‌لاتي ب رێيا هێلا ئينتێرنێتێ‌ ل سه‌ر تورا پالتالكێ‌ كۆچكه‌كا كوردي ڤه‌كرن. 12 سالا به‌ري نها راگه‌هاندنا كوردي چه‌ند يا پێشكه‌فتي ژي بيت، لێ‌ ديسا يا لاواز بوو و هند ده‌زگايێن راگه‌هاندنێ‌ ژي نه‌بوون. ره‌ڤه‌ندا كورد ل ده‌رڤه‌ پێدڤي ب هه‌بووونا ده‌زگايێن راگه‌هاندنێ‌ هه‌بوو ژ وان ژي چه‌ند خه‌مخۆره‌كێن كورد كۆ وي سه‌رده‌مي دا تاراده‌يه‌كي شاهره‌زايي ب كارينانا هێلا ئينتێرنێتێ‌ هه‌بوون، شيان كۆچكه‌كێ‌ ڤه‌ بكه‌ن ب ناڤێ‌ (كۆچكا كوردستانێ‌) و ده‌ست بده‌نه‌ گه‌هاندنا په‌ياما ره‌ڤه‌ندا كوردي ل ده‌رڤه‌ بۆ ناڤخۆيا وه‌لاتي و نووترين ده‌نگ و باسێن رۆژێ‌ ژ ده‌رڤه‌ و هوندر بگه‌هينيت. كۆچكا كوردستانێ‌ ل سه‌ر ده‌ستێ‌ چه‌ند كه‌سان هاته‌ ئاڤاكرن و تا نها به‌رده‌وامه‌ و وي ده‌مي ئه‌ندامێن رێڤه‌به‌ر كێم بوون و كه‌سێن قه‌ستا كۆچكێ‌ ژي دكرن شه‌ڤانه‌ دگه‌هشتنه‌ تا 100 سه‌د كه‌سان، لێ‌ ئه‌گه‌ر نها به‌رێ‌ خۆ بده‌يينێ‌ هژمارا ئه‌ندامێن ده‌سته‌يا رێڤه‌به‌ر پتر لێ‌ هاتنه‌، به‌لكو نێزي 45 كه‌سا تێدا كار دكه‌ن و شه‌ڤانه‌ ژ هه‌موو وه‌لاتێن جيهانێ‌ و تاييبه‌ت ل ناڤا كوردستانێ‌ ژي به‌شداريه‌كا ئێكجار زور هه‌يه‌، هژمارا سه‌دێ‌ پتر لێ‌ كريه‌ و بابه‌تێن جۆرا و جۆر ئاماده‌ و پێشكێش دكه‌ن. كۆچكا كوردستانێ‌ به‌رهه‌مێ‌ زه‌حمه‌تا دلسۆزێن كورد بوويه‌ يێن ده‌رڤه‌يي وه‌لاتي ب دووراتيا هزاره‌هان كيلۆمه‌ترا دژين و هه‌رده‌م خه‌مخۆرێن گه‌ل و نشتيمانێ‌ خۆ بوونه‌. ژ وان كه‌سێن ده‌ستپێكي 3 جانگوري بووينه‌ (شه‌هيد) سلاڤ ل وان بن (كاميران دێركي، ئه‌حمه‌د عارف و فه‌رهاد مه‌لا حه‌مدي). ب ده‌هان مامۆستا، دكتۆر، سياسه‌تمه‌دار، ديرۆكزان، هه‌لبه‌ستڤان و ره‌وشه‌نبير دگه‌ل ره‌ڤه‌ندا كورد يا ده‌رڤه‌ ته‌ڤي بابه‌تێن هه‌مه‌ ره‌نگێن كۆچكێ‌ د بن. بابه‌تێن شه‌ڤانه‌ يێن كۆچكێ‌ هه‌لبه‌ت هه‌مه‌ ره‌نگن ميناك ل سه‌ر (سياسه‌تێ‌، ئابوري، زانستي، ئاييني، وه‌رزشي، جڤاكي، ره‌وشه‌نبيري، هونه‌ري و وانه‌يێن زمانێ‌ كوردي) ژ ئاليێ‌ كه‌سانێن بسپۆر د وان بوارا دا دهێنه‌ ب رێڤه‌برن و مێهڤانێن كۆچكێ‌ به‌شداري يێ‌ دكه‌ن ب تێبيني، ديتن، بير و بوچۆنێن خوه‌. كۆچكا كوردستانێ‌ گرێدايي هيچ لايه‌نه‌كي ڤه‌ نينه‌، به‌لكو د ده‌ما خۆ دا چه‌ند سالا گرێدايي (كرگ) ببوو، لێ‌ نها هه‌ر گه‌هاندنا په‌ياما كرگ و هه‌موو پارت و رێكخراوێن كوردستانييه‌ بێيي جوداهي يا هزر و بيرێن پارتايه‌تي، د ناڤا ده‌سته‌يا رێڤه‌به‌ر ئه‌ندامێن پارتێن كوردي ژي هه‌نه‌ و كه‌سانێن سه‌ربخوه‌ ژي جه تێدا دگرن. بو ماوێ‌ پتر ژ ساله‌كي ئه‌نستيتويا دهۆك بۆ ره‌وشه‌نبيريا گشتي سمينار و بابه‌تێن ره‌نگين پێشكێش دكرن و مێهڤان ل كوردستانێ‌ ئاماده‌ دكرن ل سه‌نته‌رێ‌ كۆچكێ‌ ل باژێرێ‌ دهۆكێ. نۆكه‌ ژي هنده‌ك ئه‌ندامێن كۆچكێ‌ ل باژێرێن مينا دهۆك، زاخۆ، ئامێدي، ئاكرێ‌ و هه‌ولێرێ‌ كار دكه‌ن، لێ‌ زور جارا ئاسته‌نگا دبينن ژبو نه‌بوونا جهه‌كێ‌ باش بۆ ب رێڤه‌برنا سميناران و لاوازيا هێلا ئينتێرنێتێ‌ ل كوردستانێ‌ و نه‌بوونا به‌رده‌وام يا ئه‌له‌كتريكێ‌ (كه‌هره‌ب). ل ڤێره‌ ئه‌ز داخوازێ‌ ژ كرگ و جهه‌تێن به‌رپرس دكه‌م و وان داخواز ژي دكه‌م سه‌ره‌دانا مه‌ بكه‌ن و خه‌مێ‌ ژ مه‌ بخۆن ئه‌م پێدڤي وانين و ئه‌و ژي به‌رۆڤاژي. داخواز دكه‌م هه‌موو ئه‌و ئه‌ندامێن كۆچكێ‌ (ئادمين) ب پله‌يا رۆژنامه‌ڤاني بۆ بدانن و بكه‌نه‌ ئه‌ندامێن سه‌نديكا رۆژنامه‌ڤانێن كوردستانێ‌ و ناسنامه‌يێ‌ بۆ چێ‌ بكه‌ن، كۆ چه‌ندين جارا ئه‌و سۆزه‌ هاتبوو دانێ‌ ب رێيا ئه‌نستيتويا دهۆك بۆ ره‌وشه‌نبيريا گشتي. داخواز دكه‌م كرگ بۆ مه‌به‌ستا پتر پێشخستنا كۆچكێ‌ ل باژێرێن نوونه‌رێن مه‌ لێنه‌ سه‌نته‌ران ڤه‌ بكه‌ت يان ل بنكه‌كێ‌ ره‌وشه‌نبيري ژۆره‌كێ‌ بده‌ته‌ مه‌ بۆ پتر گه‌هاندنا ده‌نگ و باسێن رۆژێ‌ بۆ ره‌ڤه‌ندا كورد يا ده‌رڤه‌. داخواز دكه‌م تێكه‌ليێن مه‌ و ده‌ستهه‌لاتێ‌ خۆرتر بن، داكو ئه‌م بكارين بۆ هه‌ر بابه‌ته‌كێ‌ فه‌ر و د ده‌ما وێ‌ دا په‌ييوه‌نديێ‌ ب وان به‌رپرس و جهه‌تێن په‌ييوه‌نديدار بكه‌ين و راستي و له‌زاتيا وي ده‌نگ و باسي بگه‌هينين. فه‌رمۆن وه‌رن كۆچكا كوردستانێ‌ ل سه‌ر تورا پالتالك هێلا ئينتێرنێتێ‌ د خزمه‌تا وه‌ دايه‌ ب شه‌ڤ و رۆژ بۆ گه‌هاندنا په‌يامێن وه‌ ب ده‌نگ و ره‌نگ. *ئه‌ندامێ‌ ده‌سته‌يا رێڤه‌به‌ر يا كك